Ek kahaani bachpan ki
Nange panv khelte khelte koi keel ghuns gayi uske pair me, thoda chubha aur wo zor se chilla baitha. Saath me uske saathi achanak se uski taraf aa khade hue. Keel lambi si hi. Aur bechare Kaleem ka chehra chota sa, upar se uska zor zor se rona. Kaafi vichar-vimarsh ke baad, Raju ne keel nikaal dene ki thaani. Usi beech koi bheed me “tetnus” ke kayi suyian lagne ki bhi baat kar raha tha. To koi Kaleem ke chappal na pehenne ko lekar kuch keh raha tha.
Raju ne jaise hi kaleem ka pair apne haathon me liya, wo aur zor se chillane laga. “Ammi ammi” jaisi koi aawaz nikal rahi thi uski mukh se. Kafi parishram ke upraant, ek jhatke se raju ne surkh ho chuki wo lambi keel nikaal daali. Saath hi me maano khoon ka baandh bhi khul sa gaya ho jaise. Apne jeb se raju ne rumaal nikaala aur baand daala uske pair pe.
Ghar wapas pahunchne par, ammi ki thodi daant aur fir doctor saahab ke paas dher saari suiyon ki thodi aur takleef uthate hue Kareem ka kuch dinon ka aaram shuru hua.
Saalon baad kaleem chal pada tha kisi bade shaher me padhai karne. Naya shahar, naye dost aur saath nayi koi zindagi. Chuttiyon me raju aur baaki gaanv ke doston se mulakaat zaroor hoti, par dheere dheere chuttiyan bhi kam hogayi, aur milna bhi. Ab kaleem bina chappal ke to door, jooton aur gaadiyon ke ilava zameen me pair hi nahi rakhta tha.
Yun to kaleem ne raju ke prati koi khaas bartaav me tabdeeli na kit hi, par fir bhi ab baa two pehle jaisi na thi. Kabhi dekha to “hi, hello” zaroor hota, par kabhi use zyada aage kuch na badhta. Kaleem shayad ye sochne laga ki chunki dono hi ab alag alag tareekon ki jeevan-shaili ke aadi ho chuke hain, kuch raha nahi baat karne ko. Wahin Raju ke dimaag me bhi yehi baat hi daudti thi.
Ye upar jo maine “Ek kahaani bachpan ki” batane ka prayas kiya hai, koi anutha kissa nahi, balki ham sabhi ke jeevan ka ek aham hissa hai. Sabhi log is tarah ki kisi na kisi paristhithi se zaroor guzarte hain. Hum ye sochke kuch nahi karte ki shayad saamne waala aise sochta hoga, wahin shayad wo saamne waala vyakti bhi isi vichaar dhaara ka shikaar hojaata hai.
Kisi bhi rishte me chaahe kisi bhi tarah ka agar koi badlaav aata hai, to wo hamare nazariye ke chalte aata hai. Ye zaroor hai ki samay ke saath hamari zarooraten badalti rehti hain, aur usse rishton me badlaav aana swaabhavik hai, kinto badlaav ka matlab ant nahi hota.
Bachpan me ek dost ne, jise shayri ekkatrit karne ka bada shauk tha, kuch kaha tha jo mujhe abhi bhi yaad hai. “Kona kona mat chalo.. kona toot jayega.. naye se dosti mat karo.. purana chhoot jaega”
Aisa nahi hai ki hame naye dost nahi banana chahiye, par ye zaroor hai ki ham nayon me itne hi na magan hojayen ki puranon ko bhool hi jayen.
Jeevan ke kuch chuninda anubhavon ke aadhar pe itna to gyaat hai ki bachpan me jo mitrata banti hai wo bina kisi prayaas ya koi faayda ko dhyan me rakhke banti hai.
To kaisi lagi aapko ye “Ek kahaani bachpan ki” ?
(Ek aur hindi kahaani: Sameer ki Atlas cycle, zaroor padhiega)